Tíðindi

miðvikudagurinn 21. september 2022

Útgerð bv. Stefnis ÍS 28 hætt

Úthlutað aflamark í þorski hefur dregist saman um 23% á síðustu tveimur fiskveiðiárum og dragast  aflaheimildir H-G hf. saman um 1.200 tonn við það. Einnig hefur orðið veruleg skerðing  í úthlutuðu aflamarki í gullkarfa, sem hefur verið mikilvæg tegund í útgerð Stefnis.  Í ljósi þessa hefur verið ákveðið að hætta útgerð Stefnis.  Með þeirri aðgerð mun rekstrargrundvöllur annarra skipa félagsins styrkjast.

Ákveðið hefur verið að segja áhöfn skipsins, sem telur 13 manns, upp frá og með áramótum.  Útgerðin mun leitast við að útvega þeim sem missa vinnuna störf á öðrum skipum félagsins eins og kostur er.

Stefnir ÍS 28 var smíðaður í Flekkefjord í Noregi árið 1976 fyrir Flateyringa og bar fyrst nafnið Gyllir ÍS 261.   Skipið var keypt til Ísafjarðar í ársbyrjun 1993 og hefur verið gert út frá Ísafirði í nær 30 ár og hefur útgerð skipsins gengið vel.

þriðjudagurinn 9. ágúst 2022

Háafell lætur smíða þjónustubát

Um áramótin gekk Háafell ehf. frá samningum við KJ Hydraulic í Færeyjum um smíði á nýjum þjónustubáti fyrir sjókvíaeldi félagsins. Um er að ræða tvíbytnu sem er 15x8 metrar með 50 tm krana og tveimur 410 hp vélum auk 115 kw ljósavélar. Nýja tvíbytnan mun geta sinnt allri helstu þjónustu við eldið og verður með góða aðstöðu fyrir áhöfn. Áætlað er að afhending verði í haust en skrokkurinn er smíðaður í Póllandi en innréttingar, vélbúnaður og rafmagn klárað í Færeyjum. Báturinn mun sinna nýju eldissvæði Háafells í Skötufirði og heimahöfn verður í Súðavík.

Olavur Assafsson Olsen, framkvæmdastjóri KJ Hydraulic: „Við erum ánægðir með þetta verkefni, þetta er sextugasta og fyrsta nýsmíðin okkar og fimmta skipið sem er byggt fyrir fiskeldi á Íslandi. Háafell er spennandi fyrirtæki að vinna með og hafa þeir sýnt af sér fagmennsku í undirbúningsvinnu fyrir þetta verkefni. Okkar bátar eru með góða sjóhæfni, góð gæði og mikinn stöðugleika sem eru vinsælir eiginleikar fyrir fiskeldi í norður Atlandshafinu þar sem aðstæður geta verið krefjandi.

Gauti Geirsson er framkvæmdastjóri Háafells: „Við höfum góða reynslu af viðskiptum við KJ Hydraulic í Færeyjum en fyrirtækið hefur selt okkur kvíar og ýmsan búnað í eldið í að verða 20 ár. Þessi tvíbytna er mjög öflug og er enn eitt skrefið í að byggja fyrirtækið upp samhliða nýju laxeldisleyfi í Djúpinu.”

Háafell hefur leigt tvíbytnu, Hafnarnes frá Arctic Fish sem mun brúa bilið frammá haustið þar til nýsmíðin kemur. Hafnarnesið er nýkomið frá Stykkishólmi þar sem það var í slipp og var sótthreinsað og botnmálað.

föstudagurinn 1. júlí 2022

Fyrsti fóðurprammi Háafells væntanlegur

Fyrsti fóðurprammi Háafells er væntanlegur til Ísafjarðar í dag. Dráttarskipið Bestla lagði af stað með prammann þann 17. júní frá Tallinn í Eistlandi þar sem hann var smíðaður. Það er norska fyrirtækið Akvagroup sem smíðar prammann en hann tekur 450 tonn af fóðri, er 22 metrar á lengd og 12 metrar á breidd. Um borð er skrifstofa, eldhús, salerni og aðstoða fyrir starfsmenn Háafells.

Pramminn verður staðsettur í Vigurál undan Skarðsströnd á eldisstaðsetningu Háafells. Með tilkomu fóðurprammans er tryggð jöfn og góð fóðrun á staðsetningunni. Fóðurpramminn er útbúinn spenni fyrir landtengingu og hefur Háafell unnið að undirbúningi landtengingarinnar ásamt Eflu og Orkubúi Vestfjarða. Ljósavélar um borð verða því aðeins varaafl og pramminn knúinn grænni orku úr landi.

Háafell býður öllum áhugasömum að koma á að skoða fóðurprammann í innri höfninni á Ísafirði fyrir fram Edinborg mánudaginn 4. júlí á milli klukkan 16 og 18. Léttar veitingar verða í boði.

mánudagurinn 13. júní 2022

Sigurður yfirvélstjóri á Páli Pálssyni hlaut Neistann 2022

Á sjómannadaginn, á hátíðarhöldum sjómannadagsins, undanfarin ár hefur yfirvélstjóra skips verið veitt viðurkenning fyrir fyrirmyndar rekstur vélbúnaðar og umgengni um borð í viðkomandi skipi. Nefnist verðlaunagripurinn Neistinn og kom að þessu sinni í hlut Sigurðar Jóhanns Erlingssonar yfirvélstjóra á Páli Pálssyni ÍS 102. 

Við val á viðtakanda er m.a. lagt til grundvallar ástand skoðunarskylds vélbúnaðar um borð, ástand öryggis- og viðvörunarbúnaðar, rekstur á vélbúnaði skipsins og umgengni í vélarrúmum. 

Leitað er umsagnar skoðunarstofa, flokkunarfélaga og TM, en á milli 80 og 90% af öllum skoðunarskyldum búnaði um borð er á ábyrgðarsviði yfirvélstjórans. Yfirvélstjórinn er einnig sá eini í áhöfninni sem getur fengið heimild flokkunarfélaga til þess að ljúka fullnaðarskoðun á tilgreindum skipsbúnaði án þess að kvaddur sé til fulltrúi frá flokkunarfélagi.

Tilgangur viðurkenningarinnar er að vekja athygli á hversu þýðingarmikið og krefjandi starf yfirvélstjórans er og um leið að veita þeim sem skara fram úr viðurkenninguna á sjómannadegi ár hvert. 

Sigurður hefur verið vélstjóri hjá HG í 16 ár og þar af yfirvélstjóri á Páli síðastliðin 4 ár.  Það er skemmst frá því að segja hversu stolt og þakklát við erum fyrir störf Sigurðar og allrar áhafnarmeðlima. Þess má einnig geta að þetta er í annað sinn sem vélstjóri hjá okkur hlýtur viðurkenninguna en árið 2011 hlaut Hilmar Kristjánsson Lyngmo viðurkenninguna. 

þriðjudagurinn 17. maí 2022

Tímamót í Ísafjarðardjúpi

Fyrstu laxaseiði Háafells voru sett í kvíar í Skötufirði í gær. Seiðin eru flutt með brunnbátnum Papey ÍS frá seiðaeldisstöð Háafells á Nauteyri og ganga flutningar vel. Unnið hefur verið að undirbúningi í rúman áratug en Háafell sótti fyrst um leyfi fyrir laxeldi í Ísafjarðardjúpi árið 2011. Uppbygging á laxeldi í Ísafjarðardjúpi mun auka byggðafestu, fjölga atvinnutækifærum og stuðla að blómlegra mannlífi. Auk seiðaeldis á Nauteyri er Háafell því nú með laxeldi í sjókvíum í Skötufirði og regnbogasilung  við Bæjahlíð.

Einar Valur Kristjánsson, stjórnarformaður Háafells: „Við þessi tímamót verður manni fyrst hugsað til þeirra sem hafa lagt hönd á plóg í þessu umsóknarferli. Þau eiga öll þakkir skildar. Stóra verkefnið fram undan er að gæta að auðlindinni Ísafjarðardjúpi og tryggja gott heilbrigðisástand í Djúpinu. Það verður best gert með því að tryggja fjarlægðarmörk milli eldissvæða, með skýrum reglum, aðgæslu og vel þjálfuðu starfsfólki. Það hafa margir hagsmuna að gæta í Djúpinu og ef vel er á spilum haldið eiga þeir vel að geta farið saman.“