Tíðindi

föstudagurinn 30. desember 2011

Afli og aflaverðmæti skipa árið 2011

Aflaverðmæti skipa Hraðfrystihússins-Gunnvarar hf á árinu 2011 var 3.323 milljónir króna og jókst um 10 % á milli ára, þar af voru laun og launatengd gjöld kr. 1.263 milljónir eða 38% af aflaverðmæti árisins.

Útgerð skipa félagsins gekk vel á árinu og engar frátafir urðu vegna bilana.

Þrátt fyrir að Júlíus Geirmundsson væri frá veiðum í mánuð vegna slipptöku þar sem vélar voru teknar upp og skipið málað hátt og lágt var aflaverðmæti skipsins 1.624 milljónir króna sem er mesta aflaverðmæti sem skipið hefur skilað að landi.
Júlíus var á makrílveiðum í tvo og hálfan mánuð og gekk sú vinnsla afar vel.

 

Páll Pálsson stoppaði í tæpar 4 vikur vegna hefðbundinna sumarleyfa í landvinnslu félagsins.
Páll var á makrílveiðum í 3 vikur, makrílinn var góð búbót og skapaði mikilvæg störf á meðan á þeirri vinnslu stóð.

 

Stefnir varð 35 ára á árinu , Stefnir stoppaði í 5 vikur vegna skorts á aflaheimildum. Þrátt fyrir það var aflaverðmæti Stefnis 795 milljónir króna og hefur skipið aldrei skilað eins miklu aflaverðmæti í land.

 

Valur hóf veiðar á innfjarðarrækju á haustmánuðum og hefur aflað sérstaklega vel.

Afli skipa

	2011	2011	2010
Júlíus Geirmundsson	4.492 tonn	1.624 mill.	1.324 mill.
Páll Pálsson	3.967 tonn	864 mill.	986 mill.
Stefnir	2.872 tonn	795 mill.	708 mill.
Valur	180 tonn	40 mill.
Alls.	11.511 tonn	3.323 mill.	3.018 mill.

Sú mikla óvissa sem sjávarútvegurinn hefur mátt búa við allt frá því núverandi stjórnvöld boðuðu grundvallarbreytingar á starfsumhverfi hans, hafa valdið atvinnugreininni og þjónustuaðilum hennar stórfelldu tjóni. Óvissan um framtíðarfyrirkomulag sjávarútvegs hefur leitt til þess að fjárfestingar hafa verið í sögulegu lágmarki.

Hugmyndir stjórnvalda um stóraukna skattlagningu á sjávarútveginn eru auðvitað ekkert annað en skattlagning á landsbyggðina, þar sem stærstur hluti aflaheimildanna er. Á sama tíma er talað um nauðsyn þess að treysta undirstöður byggða víða um land. Hér er einhver brestur í hugmyndafræðinni.

Stjórnvöld kusu að taka ekki í útrétta sáttahönd sjávarútvegsins þegar niðurstöðu sáttanefndarinnar var stungið undir stól haustið 2010 eftir vinnu sem staðið hafði yfir í meira en eitt ár. Tækifærið til sátta er enn fyrir hendi sé til þess vilji af hálfu stjórnvalda.

Einn ráðherra ríkisstjórnarinnar líkti frumvarpi um stjórn fiskveiða, sem lagt var fram fyrr á árinu, við bílslys í sjónvarpinu nýverið. Á öðrum vettvangi líkti hann frumvarpinu við það að aka á vegg. Þetta eru orð að sönnu. Það er aftur á móti stóralvarlegt að þeir, sem ekið hafa jafn gáleysislega og ráðherrann lýsir, skuli enn sitja undir stýri.

þriðjudagurinn 27. desember 2011

Gleðileg Jól

Hraðfrystihúsið-Gunnvör hf sendir starfsfólki sínu til sjós og lands, viðskiptamönnum og landsmönnum öllum bestu óskir um gleðileg jól og gæfuríkt komandi ár.

fimmtudagurinn 15. desember 2011

Útskipun á loðdýrafóðri

Snemma í morgun hófust starfsmenn H-G og Klofnings handa við útskipun í flutningaskipið Axel. Um er að ræða rúmlega 400 tonn af fyrsta flokks frystu hráefni í loðdýrafóður sem fer til Danmerkur.

Starfsmenn Klofnings taka á móti, forvinna og frysta hráefnið sem kemur úr fiskvinnslum á norðanverðum Vestfjörðum, Klofningur er með samskonar starfsemi á Tálknafirði sem þjónustar sunnanverða Vestfirði.

 

Einnig starfrækir Klofningur afkastamikla þurrkun á Suðureyri og á Brjánslæk.

föstudagurinn 25. nóvember 2011

Hraðfrystihúsið – Gunnvör h.f. sækir um útvíkkun og stækkun á eldisleyfi í Ísafjarðardjúpi

Hraðfrystihúsið - Gunnvör hf hefur staðið að uppbyggingu fiskeldis á starfssvæði sínu í Ísafjarðardjúpi allt frá árinu 2002. Í dag er fyrirtækið með sjókvíaeldi í Álftafirði og Seyðisfirði og eina tilraunakví í Skötufirði ásamt seiðaeldisstöð á Nauteyri í Ísafirði. Í Súðavík er miðstöð sjókvíaeldisstarfseminnar með sláturhúsi, fóðurgeymslu og þjónustuaðstöðu á hafnarsvæðinu. Þar er einnig heimahöfn þjónustubáta starfseminnar sem eru sérhæfðir fyrir flutning á lifandi fiski, fóðrun og veiða til áframeldis á þorski.

Einar Valur Kristjánsson framkvæmdastjóri HG segir að áætlanir um þorskeldi, bæði hér og í Noregi, hafi ekki gengið eftir eins hratt eins áætlanir gerðu ráð fyrir.

 

„Við höfum því sótt um til Skipulagsstofnunar útvíkkun á 2.000 tonna þorskeldisleyfi í Ísafjarðardjúpi til framleiðslu á laxi og regnbogasilungi til viðbótar við þorskeldið. Samkvæmt umsókninni er óskað eftir leyfi til eldis á samtals 7.000 tonnum af fiski. Laxeldi hefur gengið vel í nágrannalöndunum og verið arðsamt. Sjókvíaeldi á þorski og laxfiskum er í grundvallaratriðum eins, aðstæður til eldisins með hlýnandi veðurfari undanfarna tvo áratugi hafa einnig styrkt það eldisform."

Einar Valur segir að HG hafi í áratug lagt ríka áherslu á að byggja upp þekkingu og reynslu meðal starfsfólks fyrirtækisins í fiskeldi, sem og þekkingu á umhverfi Ísafjarðardjúps með fiskeldi í huga.

 

„Markmiðið er að byggja upp fiskeldi sem getur tryggt örugg störf til framtíðar í sátt við náttúruna og með virðingu fyrir henni."

Vestfirðir er eitt af þremur svæðum við Íslandi þar sem stunda má laxeldi, ásamt Austfjörðum og Eyjafirði. Einar Valur segir að einörð stefna fyrirtækisins sé að fara varlega í uppbyggingu fiskeldis í Ísafjarðardjúpi, áfram verði lögð rík áhersla á rannsóknir til að fyrirbyggja hugsanlega röskun umhverfisins. Uppbygging væntanlegs fiskeldis verði unnin í sátt við aðra atvinnustarfsemi á svæðinu.

 

„Stefna HG við uppbyggingu fiskeldis á starfssvæði sínu við Ísafjarðardjúp er að unnið skuli í samræmi við sjálfbæra þróun. Sjálfbær þróun í okkar huga stendur á þremur stoðum: hagrænum, félagslegum og umhverfislegum."

 

Verði umsókn HG samþykkt er ljóst að ný störf skapast á Vestfjörðum.

„ Oft reikna menn með að um 15 bein störf skapist við hver 1.000 tonn sem framleidd eru og á þá eftir að telja afleidd störf því til viðbótar. Því gæti veruleg aukning í fiskeldi á svæðinu fljótt skapað tugi nýrra starfa eins og reyndin virðist ætla að verða á suðurfjörðum Vestfjarða. Okkar eigin reynsla af þorskeldi staðfestir einnig þessa sýn um atvinnusköpun."

þriðjudagurinn 22. nóvember 2011

Aflaverðmæti Júlíusar Geirmundssonar ÍS nálgast 1,5 millj. króna á árinu

Frystitogarinn Júlíus Geirmundsson ÍS 270 kom til Ísafjarðar sunnudaginn 20. nóvember með um 250 tonn af afurðum, eftir fjögurra vikna veiðiferð. Löndum hófst fljótlega eftir að skipið lagðist að bryggju og lauk seinnipart mánudagsins.
Áætlað verðmæti aflans er um 190 milljónir króna, uppistaðan var þorskur og grálúða.
Aflinn var að mestu tekinn á Vestfjarðarmiðum, en vegna veðurs var veitt fyrir austan land í um vikutíma. Þorskurinn fer á Bretlands- og Ameríkumarkað en grálúðan fer hins vegar á Asíumarkað.
Skipstjóri í túrnum var Ómar Ellertsson en í áhöfn eru 25 manns.

Aflaverðmæti Júlíusar Geirmundssonar það sem af er þessu ári er hátt í 1,5 milljarðar króna.
Togarinn heldur á nýjan leik til veiða á fimmtudaginn og er áætlað að hann komi til heimahafnar á Þorláksmessu.