Tíðindi

þriðjudagurinn 25. október 2011

Rækju landað í Súðavík efir margra ára bið

Þeir vour þreyttir en kátir skipverjarnir á Valnum ÍS í gærkvöldi en þá komu þeir með rúm 6 tonn af innfjarðarrækju til löndunar í Súðavík eftir níu ára bið.

Sjávarútvegs- og landbúnaðarráðherra hefur að fenginni ráðgjöf Hafrannsóknastofnunarinnar heimilað 1000 tonna veiði á rækju í Ísafjarðardjúpi. Í árlegri stofnmælingu stofnunarinnar kom fram veruleg hækkun stofnvísitölu rækju í Djúpinu og lagði hún því til að veiðar yrðu leyfðar á svæðinu.

Valurinn er eini bátur Hraðfrystihússins-Gunnvarar sem gerður er út á innfjarðarrækju sem stendur, en þegar mest var gerði fyrirtækið út þrjá innfjarðarrækjubáta frá Súðavík .

Aflinn fékkst í Mjóafjarðarkjafti og er rækjan mjög falleg að sögn þeirra félaga Haraldar Konráðssonar skipstjóra og Arnaldar Sævarssonar vélstjóra. Þeir eru tveir um borð og hafa undanfarin ár sinnt verkefnum tendgum þorskeldisstarfsemi félagsins.

Niðurstaða stofnmælinga Hafrannsóknarstofnunar er mikið fagnaðarefni fyrir atvinnulífið á Vestfjörðum, sem og íbúa svæðisins. Níu ára bið er loksins á enda.

föstudagurinn 7. október 2011

Makríllinn skilaði 175 milljóna innspýtingu í samfélagið

Makríl- og síldveiðar skipa H-G í sumar skiluðu 175 milljóna króna innspýtingu í samfélagið hér heima í formi launa og tengdra gjalda. Sveitarfélögin fengu svo að sjálfsögðu sína sneið af kökunni í gegnum skatttekjur og gjöld.

Heildar makríl- og síldveiði skipanna þriggja nam 2.273 lestum og má áætla að verðmæti aflans hafi verið meira en 400 milljónir króna. Júlíus Geirmundsson veiddi meginþorra þessa afla og án þessara veiða hefði orðið að stöðva útgerð skipsins í fyrsta skipti vegna skorts á aflaheimildum. Júlíus er nú í „andlitslyftingu" í slipp eftir góða törn.

Nánast allur afli Páls Pálssonar og Stefnis fór til vinnslu í fiskverkun H-G í Ísfélagshúsinu. Þessi vinnsla skapaði starfsfólki svo og skólafólki umtalsverða vinnu, en vel á fimmta hundrað tonn af makríl og síld voru unnin á vöktum í húsinu.

fimmtudagurinn 1. september 2011

Íshúsfélagshúsinu „strokið“

Íshúsfélagshúsið við Eyrargötu hefur ekki bara fengið andlytslyftingu á ytra byrðinu að undanförnu, heldur má segja að innviðirnir hafi einnig gengið í endurnýjun lífdaga. Nýir leigjendur hafa komið sér þar fyrir og ný fisktegund, makríll, var í fyrsta sinn unnin í talsverðum mæli í landvinnslu HG í sumar.

Guðmundur Níelsson málarameistari og félagar hans, þeir Svanbjörn Tryggvason og Gunnar Sigurðsson, hafa undanfarið nýtt góða veðrið á Ísafirði til að mála og fegra húsnæðið að utan.

Fyrr í sumar bættust svo tveir nýir leigjendur í hóp þeirra sem eru með aðstöðu í húsinu. Um að ræða sprotafyrirtækin Kerecis og ArcTrac sem hafa komið sér fyrir á þriðju hæðinni. Við bjóðum þau hjartanlega velkomin í góðan hóp.

Á fjórðu hæðinni í húsinu er fyrir sem kunnugt er Sjúkraþjálfun Vestfjarða með sína starfsemi. Þar er bæjarbúum m.a. boðið upp á tækjasal til líkamsræktar. Á jarðhæðinni er Klofningur ehf. með starfsemi sem felst í frystingu loðdýrafóðurs.

H-G er svo að sjálfsögðu sjálft með öfluga starfsemi í húsinu, þar sem hluti landvinnslu félagsins er staðsettur. Starfsmenn hennar fengu nýtt hráefni til úrvinnslu í sumar en þar voru lausfryst á fimmta hundrað tonn af makríl, sem allur fór til manneldis. Þessa vinnsla skapaði starfsfólki svo og skólafólki umtalsverða vinnu í sumar.

miðvikudagurinn 13. apríl 2011

Góðir gestir í heimsókn

Í morgun komu góðir gestir í heimsókn, Norski sendiherrann Dag Wernö Holter ásamt Birnu Lárusdóttur ræðismanni Norðmanna.

Gestirnir kynntu sér starfsemi og sögu fyrirtækisins, skoðuðu bolfiskvinnsluna í Hnífsdal í og smökkuðu á hluta af þeim afurðum sem fyrirtækið framleiðir.

miðvikudagurinn 16. mars 2011

Stefnir ÍS 28 er 35 ára í dag og ber aldurinn vel

Þess er í dag minnst að 35 ár eru liðin frá því togarinn Stefnir ÍS 28, sem Hraðfrystihúsið - Gunnvör hf. hefur gert út undanfarin 18 ár, kom fyrst til hafnar á Flateyri. Togarinn fékk nafnið Gyllir og var gerður út frá Flateyri. Þetta er 50 metra langt skip, smíðað í Flekkefjord í Noregi.

Talsvert var fjallað um sölu Gyllis til Ísafjarðar í fjölmiðlum á sínum tíma. Stofnað var sérstakt félag um kaupin, Þorfinnur hf. Flateyrarhreppur átti 30% í því fyrirtæki og nýtti sér þannig forkaupsrétt á togaranum. Þorfinnur var síðar sameinaður Íshúsfélagi Ísfirðinga hf. sem svo aftur sameinaðist Hraðfrystihúsinu - Gunnvöru hf. árið 2000.

Einar Oddur Kristjánsson, sem þá var framkvæmdastjóri Hjálms á Flateyri sem gerði Gylli út, sagði þann 7. janúar 1993 í viðtali við Morgunblaðið: „Það ætti enginn Íslendingur að velkjast í vafa um að þessi atvinnugrein á í miklum kröggum og fyrirtækin róa lífróður til að halda sér ofansjávar."

Þegar gengið var frá kaupunum, nokkrum árum fyrir sameiningu sveitarfélaga á svæðinu , sagði þáverandi stjórnarformaður Íshúsfélags Ísfirðinga hf., Þorleifur Pálsson, sem nú er bæjarritari í Ísafjarðarbæ, m.a. í viðtali við DV þann 13. janúar 1993:
„Menn verða að taka höndum saman á þessu svæði hér og sjá til þess að skip og kvótar fari ekki í burtu. Þingeyri, Flateyri, Suðureyri og Ísafjarðardjúp, þetta er allt að tengjast í eitt atvinnusvæði. Við áttum fyrir helming í togara á Þingeyri á móti heimamönnum þannig að þetta fyrirkomulag er ekki nýtt hjá okkur." Á sömu tímamótum er einnig haft eftir Þorleifi í Tímanum að á árinu 1992 hafi atvinnuleysisdagar hjá Íshúsfélaginu verið 40 talsins vegna hráefnisskorts.

Eins og títt er sagt um afmælisbörn á besta aldri ber Stefnir ÍS 28 aldurinn vel. Hann sækir mikið í steinbít og skilaði 700 milljónir króna aflaverðmæti á síðasta ári. Skipstjórinn, Pétur Birgisson og áhöfn hans eru þekkt fyrir gæðafisk og fyrirtaks frágang á afla.